Danzarte ta siña muchanan téknikanan di sirko (òktober 2008)
Fundashon Danzarte Studio (Kòrsou) ta ofresé kursonan di sirko na 50-75 mucha i hóben entre 6 pa 17 aña. E aktividatnan aki ta úniko riba e isla. Aparte di siña téknikanan di sirko, e partisipantenan ta siña hopi otro kos tambe, por ehèmpel nan ta desaroyá nan abilidatnan kreativo i sosial na un manera positivo. Esaki nan ta reflehá durante nan presentashonnan tambe. Pa medio di e aktividatnan aki e hóbennan ta deskubrí diferente posibilidat i nan ta siña for di yòn ku nan mester perserverá i siña traha ku otro hende. Esaki ta un di e motibunan ku ta duna Danzarte un kombinashon úniko di arte i trabou sosial. Ku yudansa di Het Startbureau nan a logra kumpra diferente material pa e sirko.
Hóbennan ta siña tokante “horeca” den restorant E Boneriano (òktober 2008)
Fundashon Proyekto (Boneiru) ta ofresé un training na 25 hóben ku problemanan di komportashon, - estudio, - desaroyo personal i/òf hèndikèp mental. Un di e trayektonan ta wòrdu organisá pa e restorant edukashonal ‘E Boneriano'. Diariamente e hóbennan aki ta sigui kursonan ku ta amplia nan bista enkuanto nan edukashon en general, pero espesialmente riba estudionan di “horeca”. E restorant ta eksistí danki na un bon servisio tékniko i tambe dor di nan mes hardin di plantashon/ kunuku, kual tambe ta wòrdu manehá dor di e hóbennan ariba menshoná. Den Novèmber próksimo, studiantenan di ROC Landstede lo biaha pa Boneiru pa asina duna un kontribushon na e plantashon aki.
E restorant, kual ta aktivo for di 2007, ta duna kursonan den “horeca” i tambe hospitalidat. Durante dos mainta den siman, e hóbennan ta habri porta pa asina risibí kliente. Klientenan por saboriá un desayuno i tambe kòfi, te, djus òf bolo traha na kas. E hóbennan ta fungi komo weiter, kahera, kòki òf den limpiesa. Durante e delaster lunanan den koperashon ku Fundashon Het Startbureau a traha riba futuro ampliashon di e restorant. Esaki tabata danki na un donashon di AMFO i na opsekio di material pa merkadeo di Fundashon DOEN. Dos otro fundashon tambe a hasi un donashon pa asina kumpra un bus komo transporte di e hóbennan.
Di “hockey” na Den Haag pa yudansa sosial na Kòrsou. (yüli 2008)
Fèrfmentu di kas di esnan ménos privilegiá, bishita na parke di abestrus ku mucha chikí, proyektonan di limpiesa di naturalesa i aktividatnan deportivo pa muchanan ku desabilidat...tur esakinan i mas bou di e solo tropikal na Kòrsou. Durante fakansi grandi 8 hóben di e “Youth Academy” di e asosashon di “hockey” na Den Haag (HDM) lo traha boluntariamente na proyektonan sosial riba nos isla, den koperashon ku hóbennan di Kòrsou.
“Youth Academy” ke laga e hóbennan aki siña kiko kier men lanta den un otro pais. Anualmente e hungadónan di “hockey” hóben aki ta bai diferente pais pa asina nan kontribuí ku proyektonan sosial di e pais mes. Ku koperashon ekstenso di e organisashonnan lokal e hóbennan aki ta siña kon pa organisá i implementá tur e proyektonan. E promé fakansi di labor aki a tuma lugá na Kòrsou na 2007. Hóbennan di Den Haag a partisipá na e plan di fakansi di SEDREKO i De Savaan. Nan a organisá entre otro aktividatnan deportivo pa mucha i tambe pa hóbennan ku desabilidat.
Fundashon Het Startbureau ta enkargá ku e programashon. Banda di esaki vários organisashon lokal tambe ta envolví. Empresarionan chikí, manera karpinté, elèktrishèn, mètsla i fèrfdó tambe ta traha duru pa organisá e proyektonan aki. E programa di televishon Dun'é un Chèns lo hasi grabashonnan pa asina pasa esaki na televishon. Hóbennan di Den Haag i tambe Kòrsou a tene fundraisingnan pa rekoudá fondo pa e proyektonan aki, manera entre otro un sena. Aparte di esaki nan a aserka diferente fondo sosial i spònser.
Presentashon di Investigashon Kultural a Fundashon DOEN (mei 2008)
Djasabra 24 di Mei 2008, e profeshonalnan hóben di Fundashon Het Startbureau a presentá e resultadonan di nan investigashon tokante Arte i Kultura na Kòrsou. E mensahe general ta enserá: “Invertí den talento, emansipashon i identifikashon di un pueblo”. E presentashon tabata un parti di e bishita di Fundashon DOEN na Kòrsou, kual a keda organisá dor di Fundashon Het Startbureau. E programashon tabata konsistí di entre otro un bishita na proyektonan di agrikultura den bario, proyektonan ambiental i tambe un restorant pa hóbennan na Boneiru.
Inougurashon di ouspisio (mart 2008)
Riba 3 di mart 2008, Fundashon Hamied a inougurá e promé ouspisio na Kòrsou. E ouspisio aki ta situá na Otrabanda i e ta un bibienda kaminda pashèntnan ku malesa króniko/terminal por disfrutá di nan último fase di bida bou di kuido personal i profeshonal. E pashèntnan i nan sernan kerí por haña tratamentu seditivo riba áreanan físiko, emoshonal, sosial i spiritual. Famia, boluntarionan i otro profeshonalnan manera dòkter di kas i trahadónan di hospital ta koperando pa logra esaki.
Resientemente 15 boluntario a registrá na e proyekto. Prinses Wilhelminafonds i e servisio pa obranan di karidat di Sint Elisabeth Hospital ta registrá e pashèntnan ku a afiliá for di mart. Danki na un donashon di Wilhelminafonds i Fundashon Sluyterman van Loo, por konstruí e ouspisio aki. Aktualmente nan ta hasiendo un petishon na AMFO pa un “Relaxation & Welness Garden”. Fundashon Het Startbureau ta sostené Hamied den e desaroyo di e proyekto i tambe e petishonnan finansiero.
6 ‘Young Professional' aktivo (òktober 2007)
For di Òktober 2007 tin 6 hóben -adulto trahando na Fundashon Het Startbureau. Nan ta entre 20-29 aña i ta nasé na Kòrsou. 5 di nan ta studia na Universidat Nashonal di Antia i nan ta ehekutá e tareanan banda di nan estudio. E di 6 ta siguiendo algun kurso banda di su trabou. 3 studiante ta hasiendo un investigashon riba e tereno di Arte i Kultura na Kòrsou i e otro 3 ta okupá ku desaroyo di proyektonan i e reportahe di esaki.